Në Prishtinë janë vendosur 24 kamera me njohje automatike të targave, 6 kamera multisensor dhe një kamerë rrotulluese në nëntë lokacione kryesore të qytetit për të monitoruar trafikun. Këto kamera do të identifikojnë në kohë reale shkeljet e trafikut si tejkalimi i shpejtësisë, mosrespektimi i semaforëve dhe ndalimi në vende të palejuara, ndërsa gjobat do t’u dërgohen drejtpërdrejt në shtëpi qytetarëve që bëjnë shkelje. Projekti është një bashkëpunim i Policisë së Kosovës dhe Drejtorisë për Siguri dhe Emergjenca të Kryeqytetit, pjesë e strategjisë për forcimin e sigurisë publike dhe menaxhimin e trafikut urban. Sipas ish-zv ministrit të Punëve të Brendshme, Valdet Hoxha, kjo praktikë ndërkombëtare pritet të ulë ndjeshëm numrin e aksidenteve dhe të përmirësojë mbarëvajtjen e komunikacionit në kryeqytet.