Mbrojtësi i Real Madridit, Raul Asencio, është dënuar me një gjobë prej 14,400 eurosh dhe pezullim të patentës për tetë muaj, pasi u kap duke drejtuar makinën në gjendje të dehur në Gran Canaria më 16 gusht. Testi i alkoolit tregoi një nivel prej 0.90 mg/l, shumë mbi kufirin ligjor spanjoll prej 0.25 mg/l. Përveç këtij dënimi, Asencio do të përballet së shpejti në gjykatë për një çështje më serioze, që lidhet me përhapjen e dyshuar të pamjeve me përmbajtje seksuale pa pëlqim, ku janë përfshirë dy vajza të reja, njëra prej të cilave ishte e mitur në kohën e ngjarjeve në qershor 2023 në Ishujt Kanarie. Në hetim janë përfshirë edhe tre ish-bashkëlojtarë të tij nga skuadra rezervë e Real Madridit, ndërsa prokuroria ka kërkuar dy vjet e gjysmë burgim për Asencion, duke e komplikuar më tej situatën e tij ligjore dhe profesionale.