Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimin pasuror ndaj shtetasit A.H., i dënuar në Itali për trafik droge, dhe personave të lidhur me të. Hetimet zbuluan se pasuritë, përfshirë 5 apartamente, 2 njësi shërbimi, 16.719 m2 tokë arë dhe kuotat e 5 shoqërive tregtare, janë krijuar nga veprimtari kriminale dhe nuk justifikohen me burime të ligjshme financimi. Shtetasi A.H. ka përdorur shoqëri të ndryshme për të fshehur origjinën e fondeve, duke kryer veprime fiktive dhe transaksione jashtë sistemit bankar, ndërsa vlera prej mbi 100 milionë lekësh është përdorur për investime dhe përfitime të ndryshme ekonomike. Prokuroria kërkon konfiskimin e këtyre pasurive dhe shpreh angazhimin për ndjekjen e mëtejshme të pasurive që rrjedhin nga aktiviteti kriminal.