Prokuroria Themelore në Gjakovë ka kërkuar paraburgim prej 30 ditësh për shtetasin shqiptar A.B., i arrestuar më 3 prill 2026 në Gjakovë, pasi në automjetin e tij janë gjetur dhe sekuestruar mbi 5 kilogramë marihuanë. Policia e Kosovës ka ndaluar të pandehurin në parkingun e një restoranti në rrugën “Megzon Boshnjaku” dhe gjatë kontrollit në “Ford Focus”-in e tij janë gjetur dhjetë qese me substancë narkotike të dyshuar si marihuanë, si dhe janë sekuestruar automjeti dhe dy telefona që dyshohet se janë përdorur për transportimin e drogës. A.B. dyshohet për veprën penale të blerjes, posedimit, shpërndarjes dhe shitjes së paautorizuar të narkotikëve sipas nenit 267 paragrafi 2 të Kodit Penal të Kosovës. Prej datës 3 prill, ai ndodhet nën masën e ndalimit 48-orësh, ndërsa tani prokuroria ka nisur hetimet dhe ka kërkuar paraburgimin e tij në gjykatë.