Prokuroria Themelore në Prishtinë ka iniciuar një rast ndaj zyrtarëve përgjegjës të Komunës së Prishtinës për të verifikuar nëse veprimet apo mosveprimet e tyre përbëjnë veprën penale “Keqpërdorim i pozitës apo autoritetit zyrtar”, pas shembjes së dheut në rrugën “Don Shtjefën Kurti”. Autoriteti ka autorizuar ndërmarrjen e të gjitha veprimeve të nevojshme për grumbullimin e informatave dhe provave shtesë lidhur me këtë ngjarje, duke theksuar përkushtimin për forcimin e sundimit të ligjit dhe ruajtjen e interesit publik. Shembja ka shkaktuar dëme në sistemin energjetik dhe në gypat e ujit, ndaj ekipet e KOSTT dhe KRU Prishtina kanë dalë në vendin e ngjarjes për të rikthyer shërbimet. Hetimet janë në vazhdim me qëllim zbardhjen e plotë të përgjegjësive penale dhe administrative lidhur me këtë incident.