Prokuroria Themelore në Prishtinë ka nisur hetimet pas një sulmi fizik ndaj gazetarit Burim Pacolli, i cili ndodhi rreth orës 16:00. Menjëherë pas marrjes së informacionit, prokurori kujdestar ka autorizuar Policinë e Kosovës për të ndërmarrë veprime hetimore me qëllim identifikimin dhe lokalizimin e personave të dyshuar, si dhe sigurimin e provave relevante. Hetimet po zhvillohen në koordinim të plotë me Prokurorin e Shtetit dhe trajtohen me prioritet, duke garantuar një proces të shpejtë, të paanshëm dhe profesional. Për shkak të fazës së hershme të hetimit, nuk janë dhënë detaje të mëtejshme, ndërsa organet e rendit vazhdojnë punën intensive për zbardhjen e rastit.