Prokurori i shtetit, Naim Abazi, në seancën gjyqësore për sulmin terrorist në Banjska, propozoi administrimin e dy raporteve juridike ndërkombëtare nga SHBA-ja, të cilat përmbajnë të dhëna teknike dhe materiale fotografike nga Google dhe Meta lidhur me llogarinë e të pandehurit Dushan Maksimoviq. Këto prova përfshijnë fotografi armësh dhe municioni, të dhëna navigimi në Kosovë dhe rrjete komunikimi mes të akuzuarve, të siguruara sipas standardeve ndërkombëtare. Avokatët e të akuzuarve kundërshtuan propozimin, duke argumentuar se provat nuk lidhen drejtpërdrejt me klientët e tyre ose janë siguruar në kundërshtim me ligjin, ndërsa i pandehuri Maksimoviq kërkoi të ketë mundësinë të shikojë video-incizimet në aktakuzë për të vërtetuar pafajësinë e tij. Në këtë rast janë të akuzuar 45 persona për sulmin terrorist më 24 shtator 2023 në Banjska, ku mbeti i vrarë polici Afrim Bunjaku, dhe seanca gjyqësore do të vazhdojë nesër në orën 09:30.