Ushtruesi i Detyrës së Kryeprokurorit të Shtetit, Agron Qalaj, së bashku me Koordinatoren Kombëtare për Zgjedhje, prokuroren Laura Pula, diskutuan për trajtimin e rasteve penale që lidhen me cenimin e së drejtës së votimit gjatë procesit zgjedhor. Gjatë ditës së zgjedhjeve, Prokuroria ka pranuar disa informata për parregullsi, nga të cilat pas verifikimit janë konfirmuar 17 raste me elemente të veprave penale. Pesë persona janë ndaluar menjëherë në ditën e zgjedhjeve, ndërsa 12 të tjerë janë liruar në procedurë të rregullt, dhe rastet po trajtohen në prokuroritë themelore. Të dy zyrtarët ritheksuan angazhimin e sistemit prokurorial për mbrojtjen e integritetit të zgjedhjeve dhe për reagim të menjëhershëm ndaj çdo tentative për cenim të vullnetit të qytetarëve.