Në një dyqan elektroshtëpiakesh në zonën e ish-Doganës në Tiranë, dy pronarët, një burrë 63-vjeçar dhe një grua 41-vjeçare, janë arrestuar pasi dyshohet se kanë mbajtur peng dhe kanë ushtruar dhunë fizike ndaj një kliente. Konflikti nisi për motive të dobëta dhe u përshkallëzua kur ata i hoqën lirinë klientes duke e mbajtur kundër dëshirës së saj në ambientet e dyqanit. Gjatë ndërhyrjes së Policisë, të dy të arrestuarit kundërshtuan me forcë punonjësit, ndërsa gruaja dyshohet se ka goditur një efektiv, duke i shkaktuar dëmtime të lehta. Materialet i janë referuar Prokurorisë për veprime të mëtejshme hetimore.