Policia e Kosovës ka arrestuar Armend Sahitin, pronarin e autosallonit “Armando” në Vushtrri, nën dyshimin për falsifikim të dokumenteve të pesë automjeteve. Hetimet nisën pas një njoftimi nga QAK-Eurolab, që ngriti dyshime për ndryshimin e viteve të prodhimit në librezat koreane të veturave, me qëllim regjistrimin e tyre në Kosovë. Njësia e Auto-Krimeve në Mitrovicë, në bashkëpunim me Doganën dhe Prokurorinë, kreu kontrolle dhe intervistoi edhe djalin e të dyshuarit, i cili u lirua në procedurë të rregullt. Armend Sahiti është ndaluar për 48 orë, ndërsa hetimet për këtë rast vazhdojnë nën koordinimin e Prokurorit të Shtetit.