Onkologu Ilir Kurtishi shpjegon se vetëm një pjesë shumë e vogël e pacientëve me kancer pankreasi janë të përshtatshëm për trajtim kirurgjikal, pasi shumica diagnostikohen në faza të avancuara të sëmundjes. Trajtimi i kancerit të pankreasit është multidisiplinar dhe përfshin kirurgjinë, kimioterapinë dhe radioterapinë, por operacioni mund të kryhet vetëm kur tumori është i lokalizuar dhe i aksesueshëm. Vetëm rreth 5 deri në 10 për qind e pacientëve janë kandidatë për ndërhyrje kirurgjikale, ndërsa shumica trajtohen me protokollet standarde të kimioterapisë. Në disa raste, kimioterapia mund të zvogëlojë tumorin dhe të krijojë mundësinë e një operacioni të mëvonshëm, pas rivlerësimit nga specialistët.