Zyra e Prokurorit të Specializuar (ZPS) ka kundërshtuar kërkesën e ish-presidentit Hashim Thaçi për lirimin me kusht, pavarësisht se ai ka ofruar një dorëzani prej 50,000 eurosh dhe është zotuar të përmbushë mbi 13 kushte të tjera që mund t’i caktojë gjykata. Sipas ZPS-së, arsyet për mbajtjen e tij në paraburgim, përfshirë rrezikun e arratisjes, vazhdojnë të jenë të vlefshme dhe nuk ka nevojë për rishikim, pasi këto arsye janë konfirmuar edhe më parë nga gjyqtari Charles Smith. Gjithashtu, Prokuroria thekson se nuk ka ndodhur asnjë ndryshim drastik të rrethanave që do të justifikonte lirimin e tij, ndërsa procesi gjyqësor nuk ka përfunduar ende, pasi nuk janë dorëzuar dosjet përfundimtare dhe nuk janë mbajtur fjalët përmbyllëse. Vendimi për vazhdimin ose jo të paraburgimit të Thaçit pritet të bëhet i ditur në fillim të gushtit.