Një punëtor 48-vjeçar ka humbur jetën tragjikisht gjatë orarit të punës në një kompani në zonën industriale të Shtimes, rreth orës 20:45 të së martës. Ai pësoi lëndime gjatë procesit të punës dhe u dërgua menjëherë në Emergjencën e Ferizajt, ku stafi mjekësor konstatoi vdekjen e tij. Në vendin e ngjarjes u angazhuan menjëherë njësitë policore, hetuesit, krimteknikët, prokurori dhe Inspektorati i Punës për të zbardhur rrethanat e aksidentit. Për shkak të rritjes së rasteve fatale në vendin e punës, ministri Andin Hoti ka paralajmëruar një aksion të jashtëzakonshëm inspektimesh në sektorët me rrezik të lartë, duke paralajmëruar masa të rrepta ndaj kompanive që nuk respektojnë standardet e sigurisë.