Një turist gjerman fitoi një dëmshpërblim prej 986.70 eurosh pasi gjatë pushimeve në ishullin grek Kos nuk mundi të siguronte shezlongë pranë pishinës së hotelit ku qëndronte me familjen. Ai kishte rezervuar një qëndrim 11-ditor në një hotel me 384 dhoma, duke paguar mbi 7,000 euro, por shezlongët ishin të zënë që nga ora 6 e mëngjesit, pasi pushues të tjerë i rezervonin me peshqirë në shkelje të rregullave të hotelit. Pavarësisht ankesave tek operatori turistik dhe stafi i hotelit, problemi nuk u zgjidh, dhe familja mundi të përdorte shezlongë vetëm një herë gjatë gjithë qëndrimit, ndërsa fëmijët qëndronin në tokë mbi peshqirë. Gjykata e Hanoverit vendosi në favor të turistit, duke vlerësuar se shërbimet e ofruara nuk përputheshin me ato të premtuara, dhe se hoteli duhej të kishte një numër të arsyeshëm shezlongësh në raport me kapacitetin e tij.