Komuna e Podujevës ka reaguar ndaj një informacioni të përhapur nga faqja “Llapianët” që pretendonte për hyrje të mbyllur në Qendrën Kryesore të Mjekësisë Familjare (QKMF). Sipas komunës, hyrja ku disa qytetarë janë parë duke kaluar rrethojat nuk i përket QKMF-së, por objektit të Shërbimit Spitalor dhe Klinik Universitar të Kosovës (SHSKUK), ku ofrohen shërbime të shëndetit mendor dhe që mbahet e mbyllur për arsye sigurie. Komuna thekson se hyrjet e QKMF-së janë të hapura dhe funksionale 24 orë në ditë, duke siguruar qasje të lirë për qytetarët. Ajo gjithashtu u bën thirrje qytetarëve të përdorin hyrjet e rregullta dhe të shmangin kalimin në hapësira jo të destinuara për këmbësorët, për të garantuar sigurinë dhe rendin në zonë.