Qendra Klinike Universitare e Kosovës (QKUK) ka njoftuar se përcjellësit e pacientëve në Klinikën e Pediatrisë dhe Klinikën e Kirurgjisë së Fëmijëve janë të liruar nga tarifa prej 3 euro për natë gjatë qëndrimit në këto klinika, në përputhje me Udhëzimin Administrativ në fuqi. Po ashtu, nga kjo pagesë përjashtohen edhe përcjellësit e pacientëve të Klinikës së Onkologjisë dhe të gjitha klinikave ku trajtohen pacientë me sëmundje malinje, si dhe të gjithë përcjellësit e pacientëve nën 18 vjeç dhe pacientët me sëmundje kronike. QKUK thekson se në Klinikën e Pediatrisë dhe Klinikën e Kirurgjisë së Fëmijëve, përcjellësit nuk kanë paguar kurrë tarifën prej 3 eurosh për natë. Ndërkaq, Koalicioni i OJQ-ve për Mbrojtjen e Fëmijëve në Kosovë (KOMF) ka shprehur shqetësim lidhur me pagesën ditore për prindërit dhe kujdestarët ligjorë të fëmijëve mbi 15 vjeç, duke e cilësuar këtë vendim në kundërshtim me ligjet dhe konventat ndërkombëtare në fuqi në Kosovë.