Në Qendrën Klinike Universitare të Kosovës (QKUK) është realizuar për herë të parë intervenimi kirurgjik minimal invaziv Nephrolitotomia Perkutane (PCNL) për trajtimin e gurëve të mëdhenj në veshka. Ky avancim i rëndësishëm në fushën e urologjisë ofron një alternativë moderne dhe më pak invazive për pacientët, të cilët më parë detyroheshin të kërkonin trajtim jashtë sistemit publik shëndetësor. Procedura u krye nga ekipi i Klinikës së Urologjisë në bashkëpunim me Klinikën e Anesteziologjisë, duke përdorur teknologjinë e laserit holmium që mundëson thyerjen dhe largimin e gurëve përmes një prerjeje shumë të vogël në lëkurë. Pacienti i parë që u trajtua me sukses me këtë metodë është liruar në gjendje të mirë shëndetësore, duke shënuar një hap të rëndësishëm në avancimin e shërbimeve mjekësore në Kosovë.