Qendra Klinike Universitare e Kosovës ka reaguar pas raportimeve në media që flisnin për mungesë të oksigjenit medicinal, duke mohuar këto pretendime dhe duke siguruar se furnizimi po vazhdon pa ndërprerje. Sipas QKUK-së, nuk ka pasur asnjë moment mungesë të oksigjenit që të rrezikojë trajtimin apo shërbimet shëndetësore për pacientët. Institucioni thekson se procedurat për lidhjen e kontratës së re për furnizim janë në zhvillim dhe po ndiqen sipas rregullave përkatëse. Në përfundim, QKUK i bën thirrje mediave të raportojnë vetëm bazuar në burime zyrtare për të shmangur dezinformimin dhe shqetësimet e panevojshme te qytetarët.