Agjencia e Ushqimit dhe Veterinarisë (AUV) ka njoftuar tërheqjen e menjëhershme nga tregu të qumështit UHT “Land” 3.2% të prodhuar nga Qumështorja VITA, pasi është konstatuar prania e aflatoksinës M1 mbi nivelin e lejuar. Ky veprim u ndërmor pas pranimit të informacionit zyrtar nga autoritetet e Maqedonisë së Veriut dhe në përputhje me Ligjin për Ushqim, i cili e konsideron ushqimin me mykotoksinë mbi kufirin si të dëmshëm për konsumatorët. AUV ka nisur kontrolle dhe verifikime të gjurmueshmërisë së produktit dhe bashkëpunon me Ministrinë e Bujqësisë dhe Ministrinë e Shëndetësisë për përcaktimin e masave të mëtejshme ndaj stabilimentit prodhues. Publiku do të informohet për çdo zhvillim të ri lidhur me këtë çështje, duke garantuar transparencë dhe siguri ushqimore.