Policia e Kosovës në Prizren ka intensifikuar shqiptime gjobash ndaj shoferëve që kryejnë kundërvajtje, të cilët janë raportuar nga vetë qytetarët përmes aplikacionit “Lajmëro Policin” dhe kanaleve të tjera të komunikimit. Shumica e shkeljeve të evidentuara lidhen me parkime të parregullta, të cilat qytetarët i dokumentojnë me fotografi dhe video, duke ndihmuar në verifikimin e rasteve. Pas verifikimit të materialeve të paraqitura, kundërvajtësit kontaktohen përmes telefonit dhe gjobiten menjëherë. Policia falënderon qytetarët për bashkëpunimin e tyre dhe i fton drejtuesit e mjeteve të respektojnë rregullat e trafikut, veçanërisht në lidhje me parkimin, për të mos penguar qarkullimin e lirë të këmbësorëve dhe mjeteve.