Në qytetin e Latinës në Itali, karabinierët zbuluan një rafineri të sofistikuar të kokainës e fshehur mes bimësisë pranë një banese, ku u arrestuan pesë persona, përfshirë një shtetas shqiptar. Laboratori ishte i pajisur me mjete të avancuara për prerjen, rafinimin dhe paketimin e kokainës, ndërsa u sekuestruan afro 9 kilogramë kokainë në proces rafinimi, substanca për përzierje, si dhe 27 thasë me pelet druri të ngopur me drogë. Kontrolli në banesën e të arrestuarve nxori në dritë edhe 18.2 kilogramë kokainë të gatshme për shitje, para cash, orë luksoze, bizhuteri dhe pajisje elektronike që lidhen me aktivitetin kriminal. Të arrestuarit ndodhen në burgun e Latinës dhe ekspertët po vazhdojnë hetimet për të përcaktuar sasinë dhe mënyrën e përpunimit të drogës.