Komuna e Rahovecit ka njoftuar qytetarët që kanë pësuar dëme nga erërat e forta të 21 korrikut të paraqesin kërkesat për regjistrim dhe vlerësim deri më 31 korrik. Aplikimet duhet të dorëzohen personalisht në sportelet nr. 6, 7 dhe 8 të Administratës Komunale, duke përfshirë fotografi me ngjyra të dëmeve, kopje të letërnjoftimit dhe konfirmim të llogarisë bankare. Pas pranimit të kërkesës, Komisioni Komunal do të kryejë inspektimin në terren për vlerësimin e dëmeve. Komuna u bën thirrje qytetarëve të respektojnë afatin, pasi kërkesat jashtë tij nuk do të shqyrtohen.