Kryetari i Prishtinës, Përparim Rama, ka reaguar menjëherë pas rrëshqitjes së dheut në rrugën “Malush Kosova”, duke njoftuar se institucionet janë në terren dhe monitorojnë situatën nga afër. Ai ka kërkuar nisjen urgjente të hetimeve nga Prokuroria dhe ka kërkuar pezullimin e menjëhershëm nga detyra të inspektorëve të përfshirë në këtë rast, duke ndaluar çdo angazhim të tyre deri në përfundim të hetimeve. Gjithashtu, është urdhëruar një hetim i brendshëm për të verifikuar raportet e inspektimit, frekuencën e kontrolleve dhe për të identifikuar çdo lëshim apo neglizhencë të mundshme, ndërsa Rama ka paralajmëruar masa të rënda për shkeljet, përfshirë largimin nga puna dhe ndjekjen penale. Autoritetet lokale janë në koordinim të vazhdueshëm me Policinë e Kryeqytetit, e cila ka prioritet menaxhimin e situatës dhe ruajtjen e rendit publik, ndërsa qytetarëve u bëhet thirrje të shmangin lëvizjet në zonën e prekur deri në stabilizimin e plotë të situatës.