Një mësues në Klinë është arrestuar nën dyshimin për ngacmim seksual ndaj një nxënëseje të mitur të klasës së shtatë në shkollën “At Shtjefën Gjeçovi” në Zllakuqan. Viktima ka raportuar se ka marrë mesazhe me përmbajtje seksuale dhe se mësuesi dyshohet se e ka prekur në mënyrë të papërshtatshme brenda objektit shkollor, konkretisht në kabinetin e biologjisë. Rasti është raportuar nga prindi i vajzës më 3 maj 2026 dhe është trajtuar nga Prokuroria për të Mitur, ku është intervistuar edhe viktima në prani të prindit dhe mbrojtësit të saj. I dyshuari është ndaluar për 48 orë dhe pritet masa e paraburgimit, ndërsa hetimet janë ende në vazhdim.