Banorët e fshatit Raushiq në komunën e Pejës janë përballur tashmë katër ditë me mungesë totale të ujit të pijshëm, duke shkaktuar shqetësim dhe kërkesa për zgjidhje urgjente. Ky fshat me rreth 1700 banorë është pa furnizim, ndërsa banorët nuk dinë se kujt t’i drejtohen për të adresuar problemin. Komuna e Pejës ka deklaruar se nuk është kompetente për këtë çështje dhe ka sugjeruar që përgjegjësia i takon kompanisë rajonale të ujësjellësit “Hidrodrini”. Sipas “Hidrodrinit”, mungesa e ujit është pasojë e rritjes së konsumit, keqpërdorimeve dhe thatësirave në burimet ujore, ndërkohë që inspektorët e kompanisë janë në terren dhe po penalizojnë keqpërdoruesit për të rikthyer furnizimin.