Gjykata Provinciale e Madridit ka vendosur se Real Madridi dhe drejtuesit e tij nuk kanë kryer asnjë vepër penale lidhur me zhurmën nga koncertet në stadiumin “Santiago Bernabéu”. Vendimi rrëzon procedurën penale ndaj drejtorit të përgjithshëm dhe kompanisë që menaxhon stadiumin, duke vënë përgjegjësinë për zhurmën tek kompanitë organizatore të eventeve muzikore. Megjithatë, shoqata e banorëve të zonës Chamartín ka paralajmëruar apelim të vendimit, ndërsa disa kompani koncertesh kanë njoftuar se nuk do të rikthehen në stadium pa përmirësime në izolimin akustik ose ndryshime në legjislacionin lokal. Real Madridi ka pezulluar përkohësisht koncertet që nga shtatori 2024 dhe po punon për të përmirësuar sistemin e izolimit, pas ankesave të shumta për zhurmë dhe shqetësime të banorëve pas rinovimit të madh të arenës.