Gjykata Kushtetuese e Kosovës ka refuzuar kërkesën e ish-pjesëtarit të Policisë, Xhevat Podrimqaku, i cili kërkonte rikthimin në punë pas dorëheqjes vullnetare për të vazhduar studimet e doktoratës. Podrimqaku kishte dorëhequr në vitin 2017, duke u mbështetur në një udhëzim administrativ që garantonte të drejtën e ripunësimit, por më vonë Policia e Kosovës refuzoi kërkesën e tij për rikthim, duke aplikuar një udhëzim të ri që e kishte hequr këtë të drejtë. Gjykatat e rregullta, duke përfshirë Gjykatën Themelore, Apelin dhe Gjykatën Supreme, konfirmuan refuzimin, duke argumentuar se ripunësimi ishte një mundësi diskrecionale dhe jo detyrim ligjor. Kushtetuesja vlerësoi se nuk kishte shkelje të së drejtës për gjykim të drejtë dhe se vendimet ishin të arsyetuara, duke shpallur kërkesën e Podrimqakut të papranueshme.