Ekspertët paralajmërojnë se rënia e vaksinimit rutinë në Kosovë, sidomos pas pandemisë COVID-19, ka rritur ndjeshëm rrezikun për shpërthime të fruthit, një sëmundje shumë ngjitëse që mund të parandalohet me vaksinë. Raporti i Institutit të Evropës Juglindore për Politika Shëndetësore dhe Sociale tregon se mbulueshmëria me vaksinën MMR ka rënë në 82 për qind në vitin 2025, shumë poshtë pragut kritik prej 95 për qind, ndërsa komunitetet rom, ashkali dhe egjiptian kanë nivele shumë më të ulëta vaksinimi. Kjo situatë krijon “xhepa” të pambrojtur që mund të shkaktojnë shpërthime epidemike dhe rritje të barrës mbi sistemin shëndetësor, si dhe kosto sociale dhe ekonomike për familjet. Raporti rekomandon masa urgjente për forcimin e vaksinimit, përmirësimin e ndjekjes së fëmijëve dhe ndërtimin e besimit në vaksinim për të shmangur rikthimin e sëmundjeve të parandalueshme.