Gërmimet në lokacionin e njohur si “Përzhina” në Rahovec kanë rifilluar pas ndërprerjes së shkaktuar nga kushtet e motit dhe faktorë operacionalë. Gjatë punimeve të fundit janë gjetur mbetje mortore, të cilat janë zhvarrosur dhe dërguar për ekzaminim në Institutin e Mjekësisë Ligjore, ndërsa numri dhe identiteti i personave do të konfirmohen pas analizave forenzike. Në dhjetor të vitit të kaluar, gjatë gërmimeve të para në këtë zonë, u gjetën eshtrat e dy individëve, ndërsa dyshohet se në këtë lokacion ndodhen mbetje mortore të tetë viktimave. Ky proces është pjesë e një hetimi më të gjerë për personat e zhdukur gjatë luftës së fundit në Kosovë, ku ende mbeten të zhdukur mbi 1,500 persona.