Në Gjykatën e Apelit u zhvillua seanca për shqyrtimin e ankesave në rastin e Muhamet Krasniqit, ish-zyrtar i Agjencisë Kosovare të Inteligjencës, i akuzuar për keqpërdorim të detyrës dhe zbulim të informacioneve të klasifikuara. Gjykata Themelore e kishte dënuar Krasniqin me dy vite burg për keqpërdorim të pozitës zyrtare, ndërsa e kishte liruar nga akuza për zbulim të informacioneve të klasifikuara. Prokuroria ka kërkuar rigjykim duke pretenduar shkelje esenciale dhe vërtetim të gabuar të gjendjes faktike, ndërsa mbrojtja ka kërkuar refuzimin e ankesës, duke argumentuar se aktakuza është e bazuar në deklarata të një dëshmitari jo okular dhe mungesë të dëmtimit apo përfitimit pasuror nga ana e të akuzuarit.