Të martën në orën 09:30 nis rigjykimi në Gjykatën Themelore në Prishtinë për rastin e Endrit Nikës, i cili më parë ishte dënuar me 18 vjet burg për vrasjen e partneres së tij, Maria Clara Urdangaray. Avokati i Nikës, Tomë Gashi, ka bërë të ditur se ankesa e tij u aprovua nga Gjykata e Apelit, duke kthyer çështjen në rigjykim dhe rivendosje. Rasti ka marrë vëmendje të madhe pasi në një emision hulumtues u publikuan pamje dhe detaje të reja nga vendi i ngjarjes, ndërsa ekspertiza e kornizës së dritares, ku ndodhi rënia fatale, u krye vetëm pas një viti e gjysmë, pasi struktura fillestare ishte ndryshuar. Gashi thekson rëndësinë e bazimit të vendimeve vetëm në prova dhe jo në supozime, ndërsa prokuroria dhe familja e viktimës kishin kërkuar dënim më të ashpër, deri në burgim të përjetshëm.