Në Qendrën Klinike Stomatologjike Universitare të Kosovës është realizuar me sukses rehabilitimi protetik për një pacient që kishte kaluar trajtimin kirurgjikal për kancer të nofullës së sipërme. Pacienti A.S., pas një ndërhyrjeje komplekse dhe trajtimi onkologjik të vazhdueshëm, u përfshi në një proces rehabilitimi me obturator – një protezë speciale që mbyll defektet në qiellzë dhe nofullë. Ky trajtim ndihmon në rikthimin e funksioneve bazë orale si të folurit, gëlltitjes dhe ushqyerjes, duke përmirësuar ndjeshëm cilësinë e jetës së pacientit. Suksesi i këtij rasti është rezultat i bashkëpunimit multidisiplinar dhe përdorimit të protokolleve moderne në Protetikën Maksillo-Faciale, duke dëshmuar përkushtimin e QKSUK-së në trajtime rehabilituese të avancuara.