Komisioni Qeveritar për Persona të Zhdukur ka njoftuar se më 21 qershor 2026 do të bëhet rivarrimi i mbetjeve mortore të dëshmorit Hajdar Pepaj, i cili ishte në Listën e Personave të Zhdukur. Identifikimi i tij u realizua përmes analizës shkencore të ADN-së, në mbështetje të kërkesës së familjes. Ceremonia do të mbahet në varrezat e fshatit Kodrali, me fillim në orën 16:00, ndërsa një orë më parë do të zhvillohen homazhe te 'Lapidari i Ri' në të njëjtin fshat. Organizimi i këtij rivarrimi është bërë nga Shoqatat e dala nga lufta - Dega në Deçan dhe Komuna e Deçanit, me përkrahjen e Komisionit Qeveritar, i cili gjithashtu ka shprehur ngushëllimet më të sinqerta për familjen Pepaj dhe ka ritheksuar angazhimin institucional për zbardhjen e fatit të personave të zhdukur gjatë luftës në Kosovë.