Pas 27 vjetësh, janë identifikuar përmes analizës së ADN-së mbetjet mortore të tre viktimave të luftës në Kosovë, Bali Pajazit Gashi, Fadil Shaban Elezaj dhe Masar Ymer Dushi, të zhdukur gjatë masakrës së Kralanit në vitin 1999. Mbetjet e tyre u zhvarrosën nga varreza masive në Bishtazhin dhe do të rivarrosen të premten, më 27 shkurt 2026, në Klinë, sipas kërkesës së familjarëve. Ceremonia e rivarrimit organizohet nga Komuna e Klinës dhe Komisioni Qeveritar për Persona të Zhdukur dhe përfshin homazhe, një akademi përkujtimore dhe vetë rivarrimin në Varrezat e Dëshmorëve në Kodra e Kuqe – Zajm. Komisioni Qeveritar ka shprehur ngushëllime familjeve dhe ka riafirmuar përkushtimin për vazhdimin e përpjekjeve në zbardhjen e fatit dhe vendndodhjes së të gjithë personave të zhdukur me forcë gjatë luftës në Kosovë.