Komuna e Prishtinës ka njoftuar për dëmtimin e një shtylle të ndriçimit në rrugën magjistrale M-2, pranë rrethrrotullimit afër Stacionit të Autobusëve. Shtylla nuk është në pronësi apo administrim të komunës, por i përket infrastrukturës së menaxhuar nga Ministria e Infrastrukturës. Për shkak të rrezikut të mundshëm për qytetarët dhe pjesëmarrësit në komunikacion, komuna ka bërë thirrje për kujdes të shtuar gjatë kalimit në këtë segment rrugor. Njëkohësisht, është kërkuar ndërhyrje urgjente nga Ministria e Infrastrukturës për sanimin e dëmtimit dhe eliminimin e çdo rreziku potencial, me qëllim garantimin e sigurisë së qytetarëve dhe qarkullimit rrugor.