Instituti i Shëndetit Publik në Maqedoninë e Veriut ka raportuar 58 raste me ethet e Nilit Perëndimor, nga të cilat 54 janë konfirmuar dhe katër konsiderohen të mundshme. Deri më 8 gusht, tetë persona, të gjithë burra, kanë humbur jetën si pasojë e kësaj sëmundjeje infektive që transmetohet përmes pickimit të mushkonjave të infektuara. Shumica e të infektuarve nuk shfaqin simptoma ose kanë simptoma të lehta, por në disa raste sëmundja mund të shkaktojë komplikime serioze neurologjike. Instituti vijon monitorimin e situatës epidemiologjike për të parandaluar përhapjen dhe për të mbrojtur shëndetin publik.