Ligji për përdorimin e trotinetëve elektrikë u miratua para një muaji, duke vendosur kufizime të qarta për shpejtësinë dhe përdorimin e tyre, por shqetësimet e qytetarëve për sigurinë mbeten të larta. Në shtigjet për këmbësorë, trotinetët vazhdojnë të voziten me shpejtësi të madhe dhe shpesh nga persona të mitur, duke rrezikuar kalimtarët. Autoritetet kanë nisur kontrolle dhe kanë shqiptuar gjoba ndaj drejtuesve të mjeteve të lehta elektrike, me dënime që arrijnë deri në 275 euro dhe konfiskim të trotinetëve në raste të përsëritura. Megjithatë, qytetarët kërkojnë masa më efektive për të garantuar sigurinë në rrugë, pasi përdoruesit e trotinetëve janë të ekspozuar ndaj rreziqeve serioze, sidomos për lëndime në kokë.