Gjatë vitit 2025 dhe pesë muajve të parë të vitit 2026, në Kosovë janë regjistruar gjithsej 993 aksidente me mjete me dy rrota, prej të cilave 17 kanë përfunduar me fatalitet. Vetëm në pesë muajt e parë të vitit 2026 janë evidentuar 260 aksidente, ku pesë prej tyre kanë pasur pasoja fatale. Policia e Kosovës ka njoftuar se vazhdon të shqiptojë gjoba dhe të konfiskojë motoçikleta që qarkullojnë në kundërshtim me rregullat e trafikut, megjithëse statistikat e gjobave nuk ndahen sipas llojit të mjetit. Përveç masave ndëshkuese, Policia ka zhvilluar fushata vetëdijësuese për sigurinë në trafik, duke u fokusuar edhe te drejtuesit e mjeteve me dy rrota.