Gjatë periudhës 16 prill – 17 gusht 2026, në Kosovë janë konfirmuar 137 raste me fruth, me 25 raste të reja vetëm gjatë javës së fundit. Komuna e Prishtinës raporton numrin më të lartë të infeksioneve, duke u ndjekur nga Fushë-Kosova, Ferizaj dhe Obiliqi. Për të frenuar përhapjen e sëmundjes, ekipet e vaksinimit kanë intensifikuar aktivitetet në zonat më të prekura, duke vaksinuar 276 fëmijë që kishin vonesa në kalendarin e vaksinimit. Instituti Kombëtar i Shëndetësisë Publike të Kosovës apelon që çdo person me simptoma të dyshimta të fruthit të kërkojë menjëherë ndihmë mjekësore dhe nxit prindërit të sigurojnë vaksinimin e fëmijëve sipas udhëzimeve.