Gjatë periudhës 16 prill – 22 qershor 2026, në Kosovë janë konfirmuar 40 raste me fruth, me numrin më të lartë të infeksioneve në komunat e Ferizajt, Prishtinës dhe Kaçanikut. Instituti Kombëtar i Shëndetësisë Publike të Kosovës (IKShPK) ka bërë thirrje urgjente për vaksinim, duke theksuar se kjo është masa më efektive për parandalimin e sëmundjes dhe mbrojtjen e shëndetit publik. Personat me simptoma të dyshimta si temperaturë e lartë, skuqje të lëkurës, kollë, rrufë apo konjuktivit, duhet të paraqiten menjëherë në institucionet shëndetësore më të afërta. IKShPK paralajmëron për infektueshmërinë e lartë të fruthit dhe rrezikun e komplikimeve, duke bërë apel të veçantë për prindërit dhe kujdestarët që të verifikojnë dhe plotësojnë vaksinimin e fëmijëve sipas kalendarit të imunizimit.