Gjatë periudhës nga 16 prilli deri më 6 korrik 2026, në Kosovë janë regjistruar 52 raste të konfirmuara me fruth, me një rritje të vazhdueshme, përfshirë pesë raste të reja vetëm gjatë javës së fundit. Komuna e Prishtinës ka numrin më të lartë të të infektuarve, me 17 raste, ndjekur nga Ferizaj me 12 raste dhe disa komuna të tjera me shifra më të vogla. Instituti Kombëtar i Shëndetësisë Publike të Kosovës (IKShPK) apelon që çdo person me simptoma të fruthit të paraqitet menjëherë në institucionet shëndetësore dhe bën thirrje për verifikimin dhe plotësimin e vaksinimit sipas kalendarit të imunizimit. Vaksinimi konsiderohet masa më efektive për parandalimin e përhapjes së fruthit dhe mbrojtjen e shëndetit publik në komunitet.