Gjatë vitit 2025 në Kosovë janë regjistruar 99 aksidente fatale me 111 viktima, ndërsa mbi 8 mijë aksidente të tjera kanë shkaktuar më shumë se 16 mijë persona të lënduar. Një rast tragjik u raportua së fundmi në Bresje të Fushë Kosovës, ku një këmbësor humbi jetën pasi u godit nga një veturë, ndërsa gjatë 24 orëve të fundit janë shënuar edhe tetë aksidente të tjera me persona të lënduar. Ekspertët e komunikacionit theksojnë se humbjet e jetëve dhe lëndimet po mbeten vetëm statistika për shkak të mungesës së masave serioze parandaluese nga institucionet. Ata kërkojnë analiza të thelluara për shkaqet e aksidenteve, si dukshmëria e dobët, shpejtësia dhe infrastruktura rrugore, duke paralajmëruar se pa veprime konkrete numri i aksidenteve do të vazhdojë të rritet.