Gjatë dy muajve të fundit, në Kosovë janë regjistruar 36 raste të fruthit, me përqendrime më të mëdha në Ferizaj dhe Prishtinë, por edhe në komuna të tjera si Kaçanik, Fushë-Kosovë, Lipjan, Obiliq, Vushtrri, Gjilan, Shtime dhe Deçan. Instituti Kombëtar i Shëndetësisë Publike të Kosovës (IKShPK) ka bërë thirrje urgjente për vaksinimin e fëmijëve, duke theksuar se fruthi është një sëmundje shumë ngjitëse dhe vaksinimi mbetet mbrojtja më efektive kundër përhapjes së tij. Autoritetet shëndetësore kanë kërkuar nga qytetarët që të jenë vigjilentë ndaj simptomave të fruthit, si temperatura e lartë, skuqja në lëkurë, kollitja, rrufa dhe inflamacioni i syve, dhe të kërkojnë menjëherë ndihmë mjekësore. Apeli i IKShPK-së është drejtuar kryesisht prindërve dhe kujdestarëve për të kontrolluar dhe siguruar që fëmijët të jenë vaksinuar sipas kalendarit të imunizimit, duke u përpjekur kështu të frenojnë përhapjen e sëmundjes në komunitet.