Në 48 orët e fundit, në Repartin e Pediatrisë në Spitalin Klinik të Tetovës janë regjistruar 139 raste të reja me viroza sezonalë, ku simptomat kryesore përfshijnë temperaturë të lartë, të vjella dhe diarre. Nga këto raste, 12 fëmijë janë hospitalizuar, ndërsa të tjerët trajtohen në shtëpi, me mjekët që rekomandojnë kujdes të shtuar në higjienën e ushqimit dhe hidratimin e fëmijëve për të parandaluar dehidratimin. Specialistët shpjegojnë se përhapja e virozave lidhet me faktorë si temperaturat e larta, mënyra e ushqyerjes dhe kontakti mes fëmijëve, duke theksuar se nuk është e nevojshme çdo rast të shkojë në spital. Nga ana tjetër, Aleanca për Shëndetësi të Hapur (ASH) ka kritikuar heshtjen e institucioneve për situatën në Tetovë, duke kërkuar përgjigje dhe trajtim të barabartë të shëndetit publik pa ndikime politike.