Dosja e Prokurorisë hedh dritë mbi strukturën e inteligjencës dhe Policisë Ushtarake brenda Ushtrisë Çlirimtare të Kosovës (UÇK) dhe Qeverisë së Përkohshme të Kosovës (QPK). Kadri Veseli figuron si drejtues i Drejtorisë së Inteligjencës që u themelua në pranverën e vitit 1998, duke mbikëqyrur rekrutimin dhe trajnimet e personelit të specializuar, ndërsa më vonë u emërua në krye të Shërbimit Informativ të Kosovës (SHIK). Prokuroria përshkruan funksionimin paralel të G2 dhe SHIK, si dhe bashkëpunimin e ngushtë me Policinë Ushtarake dhe njësitë speciale, të cilat ishin të përfshira në veprime të ndryshme, përfshirë ndalimet dhe trajtimin e kundërshtarëve. Dosja përmend gjithashtu rolin e Policisë Ushtarake nën drejtimin e Fatmir Limajt, duke theksuar se kjo strukturë mbikëqyrte qendrat e ndalimit dhe zbatonte masa të ndryshme, ndërsa SHIK-u vazhdoi të funksiononte deri në krijimin e Agjencisë Kosovare të Inteligjencës në vitin 2008.