Kompania Rajonale e Mbeturinave “Ambienti” ka njoftuar bllokimin e procesit të shkarkimit të mbeturinave në deponinë sanitare të Sferkës, për shkak të protestave të disa banorëve që kanë bllokuar rrugën kryesore drejt deponisë. Kjo situatë ka ndikuar në pamundësinë e shkarkimit të kamionëve dhe ka penguar mbledhjen e mbeturinave në itineraret e planifikuara në qytetet Pejë, Klinë, Istog, Deçan dhe Junik, duke prekur rreth 220 mijë banorë. Kompania ka kërkuar ndërhyrjen e Policisë së Kosovës dhe organeve kompetente për të zhbllokuar rrugën dhe për të rikthyer normalitetin në shërbimet e menaxhimit të mbeturinave. Deri më tani, rruga vazhdon të mbahet e bllokuar nga protestuesit, duke vështirësuar më tej situatën dhe ofrimin e shërbimeve.