Rruga që lidh zonën e Uglarit me Bresjen në Fushë Kosovë është prej kohësh në gjendje të rënduar, duke shkaktuar shqetësim të madh tek banorët dhe drejtuesit e automjeteve. Sipas tyre, dëmtimet dhe gropat e shumta në këtë segment po vështirësojnë ndjeshëm qarkullimin dhe rrisin rrezikun për aksidente, si dhe po shkaktojnë dëme të vazhdueshme në automjete. Komuna e Fushë Kosovës ka njoftuar se ka nënshkruar një memorandum me Ministrinë e Infrastrukturës dhe është në pritje të përfundimit të një projekti, pas të cilit do të fillojnë procedurat e prokurimit për riparimin e rrugës. Banorët presin që ky proces të përshpejtohet për të përmirësuar sigurinë dhe kushtet e qarkullimit në këtë rrugë të rëndësishme.