Prokuroria Speciale ka zbuluar se Fatmir Sheholli ka marrë në vitin 2015 një shumë prej 681 mijë dinarësh, afërsisht gjashtë mijë euro, nga dy institucione shtetërore serbe, përkatësisht agjencia e lajmeve “Tanjug” dhe Zyra për Kosovë në qeverinë serbe. Pagesat janë regjistruar në llogarinë e tij në Komercialna Banka në Beograd dhe janë kryer në mënyrë periodike gjatë atij viti. Sipas Prokurorisë, këto pagesa tregojnë financimin dhe angazhimin e Shehollit në interes të një shteti të huaj, duke e lidhur atë me shërbimin sekret serb BIA. Kjo provë, së bashku me dëshmi të tjera, vërteton përtej dyshimit të bazuar mirë se Sheholli ka kryer veprimtari spiunazhi në dëm të interesave të Republikës së Kosovës.