Seanca gjyqësore ndaj 12 zyrtarëve policorë dhe dy doganierëve, të akuzuar për marrje ryshfeti në pikën kufitare Qafë Prush, është shtyrë për shkak të mungesës së dy të akuzuarve kryesorë. Sami Hajdari mungoi për shkak të një rasti mortor në familje, ndërsa Enis Turtulla nuk ishte prezent për shkak të gjendjes së rëndë shëndetësore. Mbrojtësit e të akuzuarve dhe prokurorja ranë dakord që seanca të shtyhet për të mundësuar prezencën e të gjithë palëve dhe për të vazhduar gjykimin në mënyrë të përbashkët. Sipas aktakuzës, të akuzuarit kanë lejuar hyrjen e qytetarëve dhe mallrave në Kosovë pa iu nënshtruar procedurave ligjore, duke përfituar ryshfet në kundërshtim me ligjin dhe masat kundër pandemisë COVID-19.