Seanca e planifikuar për të enjten në Gjykatën Themelore në Prishtinë për rastin e vrasjes së dyfishtë në Kolovicë është anuluar për shkak të angazhimit të avokatit mbrojtës Naim Rudari në një seancë tjetër në Departamentin Special. Në këtë rast, përveç të akuzuarit Naim Berisha, për të cilin mbrojtësi ishte i angazhuar, akuzohen edhe Ahmet Berisha, Lum Halimaj dhe Kaltrim Gashi. Gjykimi po zhvillohet në mungesë ndaj Naim Berishës dhe Kaltrim Gashit, të cilët ndodhen në arrati. Sipas aktakuzës, ngjarja lidhet me një përplasje të armatosur për motive hakmarrjeje në tregtinë e narkotikëve, ku janë përdorur armë pa autorizim dhe janë shkaktuar lëndime të rënda.